Biki ibitumiri tubisiri ukumenyeesa imyazi kwo mutima bweneene?
Wangaba wasomerwa no'kubona kwo ku mukolwa uguli nga guno gwo' kuloza ukumenyeesa abandu higulu lye' mwabo gukola mwo ibiloziri byo kumenyeesa imyazi, unakengeri salira bingi. Hano hidako tugweti tugayerekana ibitumiri tukabona kwo buliri bwija ukugwatisa ibiloziri byo' kumenyeesa imyazi ku guno mukolwa. Ugashambala ikyanya ugayusa ukubisoma.
Ku ngisi ho ikihugo kikola ku zene, ibindu bingi bimulenga mu myazi. Kare imyazi yalikiziba ya ku kanwa no kutwiri naho. Yibyo byalikizi tuma umuharuro gwa'bagalonga iyo myazi gugaba munini naho. Yibyo nabyo binatume abandu batagamenya ibyaba. Ukutamenya ibigweti bigaba kiri hangaba hala kandi li hofi, kuliri kutera kwa bweneene. Utamuneya bingi ibigweti bigaba. Nga ku nyanya kye' bombwe kandi li ndambara, abandu balikiziyijiyigwana bakola mu makayu batanamenya kuti gabahikira. Yibyo byoshi binabagage byalikizi shagirana na kwokwo kubula injira ikwanini yokuhisa umwazi.
Ku zene yibyo bitakiri yukwo. Abandu bamuleza imyazi mu njira nyingi, binatume abandu abali hala na hofi bagagimenya buzira mbuzimbuzi mbamu. Nitu twe' Bafuliiru tukoliyiji ngisi ho twangalenga na ngisi kwo twangakola higulu iyo myazi tukizi gibika mu Kifuliiru bitanabaale abandu bitu na twehe twenene tugamenya bingi na ku kyanya. Ukuyiji menya umwazi kera ne' kyanya kyalenga, ndako kamaro bigweti.
Guno mukolwa guliragi hano higulu kugwase ngisi Mufuliiru akizimenya imyazi ye'mwitu ne ya handi hoshi mu Kifuliiru. Ubuhinga buhyahya bukola hala ku zene, tunabagage nitu tukoli buyiji, tunagweti tugabuyigiriza abandi bandi. Ku benge binki tutabukoleese ku kuhikiza benewitu imyazi? Ishuvyo litali likayu li litanali linovu. Haliko, tukolage tutakilole ibikalenga na byo tutakagira, haliko tukolage.
Tugakizi leza imyazi mu njira zoshi tushobwiri ukulezamwo : Kuyandika, bizunguza, ne bindi bingi.
Longa imyazi hano
1. Ukumenya imyazi
Mu bindu ibimutuma indeto igahika hala no kumala isiku nyingi itanatereka haliri ukugiyandika. Nitu tukabwatala twanasalira higulu lyo'kudeta kwo tuluze ibiyandike mu Kifuliiru twanayijibona kwo buliri bwija tuyandike indeto yitu Kifuliiru. Kutagi tugayandika? Twanayijibona kwo bwangaba buhirwa tulengere mu njira yo'kuyandika imyazi.
Imyazi kwoshi kwo yangaba, ikyanya ikola miyandike igatabala abandu bingi bakizi soma, kuguma na yibyo binatume abandu bagakizi kengera ngisi kwo indeto yitu imuyandikwa. Yikyo kiliri kindu kihamu tugaba twahikira.
Kuno kuluza ibiyandike mu Kifuliiru kutaliri naho mu kuyandika imyazi. Abandi bandu bakwanini ukuyandika na nitu tunagenderere ukusalira bwenee na ngisi kundi twangagenderera ukukola higulu byo tulozizi bkuliri kudeta kwo abana bitu ne bibusi ibigayija bikagwane indeto yitu ikiliri hohe. Bino byobitumiri tukagwajika ikindi kihande kya guno mukolwa gwitu, tukakiberangira Fuliiru Hub higulu lyo kudeta kwo tukizisalizania no kugwasa ngisi yeshi uwangaba muguma witu ugweti inzaliro zokuzamula indeto yitu Kifuliiru.