Ukukola kuliri kuhamu bwenene. Ukudeta kwo ahandu hagendere kandi li abandu bagenderere, babanini ukukola. Nitu higulu lye'mwitu Ibufuliiru, higulu lya'bandu biitu Abafuliiru na higulu lye'ndeto yiitu Kifuliiru; tubanini ukukola bweneene no kubika imisi yiitu yooshi. Ibija byooshi twangahikira bitagashaga mu kubwatala naho kandi li mu miganulo ya kwokwo kwokwo, haliko tubanini tukole.

​

Mu Kifuliiru muliri umugani ugudesiri, "Ahashakire ho hamudwa umuko." Guno mugani guliri muhamu bweneene gunagweti ibindu bingi gubishiri mu gwohe. Umufuliiru alikizi kolesa guno mugani mukuloza ukuyereka umundu kwo abanini akole kiri hyangaba hinini, haliko agabona ibitumbwe. Bino binabagage byotulozizi ukumenya ku zene. Umufuliiru akayama amukola ukudeta kwo abere ho. Tubanini tukoleese imisi yiitu yooshi no bwenge bwitu bwooshi, na ngisi kyoshi kyo twangaba tugweti higulu kikola kyanya kino kyo'kukola higulu tukalonge byotugasigira ibibusi ibigayija nga kalaga. Tutayishinge ukugwejera kandi li ukushibe mu mashata. Haliko tubanini tukole bukayu bweneene. Ibihugo kera ibyagenderera ku zene, abandu babyo bakakola bweneene ne'ngingwe, bagenderiri ukukola ukuhisa zene. Aa, twehege tuliri hayi? Kera twakola biki? Biki tushungisiri ukukola ukudeta kwo imwitu hagenderere? Ibibuuzo ibiri nga bino bikwanini ukulonga ishuvyo. Higulu twehe twetubanini ukuyisaliza ibiringini, tunalonge ne'shuvyo ilikwanini. 

​

Umufuliiru aliri mundu uyiji, ushobwiri, ugweti byooshi ibyangahunibwa ukudeta kwo umukolwa gukolwe. Bikagi ibitumiri kiri ne'ndeto yiitu igweti igaba nga kera twagiyiyeeka? Tubanini tumenye bwija ngisi kwo tugalonge ishuvyo ku bino bibuuzo byoshi. Genderera ukusoma hano uyuvwe bingi.